„Туркиш Ерлајнс“ еднаш одбил да биде национален авиопревозник на Македонија, дали сега ќе прифати?

Добивај вести на Viber

Опцијата Туркиш Ерлајнс да биде национален авиопревозник во земјава не е нова. Таквата можност беше отворена уште пред пет години, сепак идејата тогаш не се реализираше. За можноста турската авиокомпанија „Туркиш Ерлајнс“ да биде национален, односно дезигниран авиопревозник во Македонија, Владата расправала на седница уште во 2009 година. Уште пред пред пет години, имало контакти меѓу владата и Туркиш Ерлајнс, но сепак на крајот идејата не се реализираше. Според тогашните пишувања, целата постапка била во рацете на ресорното Министерство за транспорт и врски, кое било задолжено за контакт со менаџментот на Туркиш Ерлајнс. Во тоа време, Министерството за транспорт доставило и информација до Владата дека од авиокомпанијата се побарани дополнителни информации, а кога ќе се комплетираат повторно ќе бидат доставени до Владата. Сепак подоцна, официјално од Туркиш Ерлајнс обелоденија дека немаат намера да бидат национален авиопревозник во Македонија. При тоа потенцираа дека тие се заинтересирани за бизнис можностите во Европа, и дека Македонија е важна за нив, но сепак тогаш објаснија дека во тој момент немаат планови да влезат во таков проект. Во тој период кога се воделе разговорите со Туркиш Ерлајнс, Македонија остана без национален авиопревозник. МАТ престана да лета. Во неколку наврати компанијата се соочи со проблем со носната нога на авионот, а потоа ситуацијата се искомплицира поради финансиските долгови, по што МАТ беше приземјен. Во исто време, пак, концесијата за модернизација на македонските аеродроми ја доби турски ТАВ. Дали идејата ќе се реализира пет години подоцна? Турската авиокомпанија „Туркиш Ерлајнс“ од страна на македонските власти е преферирана да стане национален авиопревозник во земјата, објави швајцарска интернет страница за информации од авијацијата, повикувајќи се на EX-YU Aviation News. Ваквиот развој на настаните доаѓа откако во 2012 година македонската Агенција за цивилно воздухопловство на турската компанија и го додели статусот „редовен авиопревозник“, давајќи и ексклузивно право да избира дестинации и да добие попусти на таксите за користење на аеродромите во Скопје и Охрид, се додава во текстот. Притоа се нагласува дека концесионерот на аеродромите, турската компанија ТАВ, лобирала за турскиот авиопревозник да воспостави своја база во Македонија. Информацијата денеска ја пренесуваат и грчките медиуми, цитирајќи изјава од поранешниот директор на Агенцијата за цивилно воздухопловство Зоран Крстевски, според кого „Туркиш Ерлајнс“ лесно би можеле да ја преземат улогата на национален авиопревозник на земјата. „Туркиш Ерлајнс ќе треба да се пријави за лиценца, да понуди бизнис план. Оваа авиокомпанија веќе работи во Македонија и е светски познат авиопревозник со силно присуство во целиот регион“, рекол Крстевски. Во моментот, база на „Туркиш Ерлајнс“ е единствено аеродромот Ататурк во Истанбул. Компанијата поседува 265 авиони и лета кон 265 дестинации во светот. Македонските власти пред околу една недела најавија дека ја започнаа потрагата за национален авиопревозник. Н.С.