Турските власти отстранија над 10 000 наставници – се подготвуваат и нови учебници

Добивај вести на Viber

Турските власти отстранија од работа над 10 000 наставници, за кои се претпоставува дека имаат врски со забранетата во земјата Курдистанска работничка партија (ПКК).

Мерката доаѓа поради тековната чистка по неуспешниот државен удар против претседателот Реџеп Таип Ердоган на 15 јули.

„Луѓето за кои станува збор, се суспендирани - во платено отсуство, очекувајќи истрага"- соопшти анонимен извор од државната администрација, цитиран од АФП.

Според податоците на агенцијата Анадолија станува збор за вкупно 11 500 лица, кои се осомничени од Министерството за образование дека учествуваат во активности во поддршка на сепаратистичката терористичка организација и нејзините филијали, како што властите ја нарекуваат ПКК. Агенцијата наведува дека се очекува бројот на отстранети од работа да порасне до 14 000 лица во рамките на истрагата што се спроведува во соработка со локалните власти. Порано за време на посетата на Дијарбакир премиерот, Бинали Јилдирим посочи дека до 14 000 наставници ќе бидат отстранети од работа поради врски со ПКК. Мерката против учителите доаѓа откако во летото лани турските власти и ПКК го прекинаа своето примирје и организацијата ги обнови нападите врз силите за безбедност. Во одговор Анкара започна голема операција во југоисточните делови на земјата.

Во исто време весникот  „Хуриет" пишува дека според турски медиуми властите во земјата ќе уништат голем број учебници, за кои се претпоставува дека се напишани од поддржувачи на турскиот проповедник Фетхулах Ѓулен, за кого Анкара смета дека стои зад неуспешниот државен удар. До почетокот на новата учебна година во Турција на 19 септември ќе бидат подготвени вкупно 250 милиони учебници кои се преработени од Министерството за образование.