Угостителите кај гувернерката, присуствувале и банкари

Добивај вести на Viber

Угостителите се сретнале со гувернерката Анита Ангеловска-Бежоска но и со претставници на банкарскиот сектор. Од Народната банка информираа дека Бежоска им кажала на претставниците на Независната угостителска комора дека ги следат сите движења во економијата и дека и кога почнала пандемсиката криза креирале мерки да им ги олеснат кредитните услови на компаниите. Угостителите бараат каква било поддршка поради последиците од долгиот период во кој беа затворени.

„На состанокот се заклучи дека во постојната законска регулатива не постојат пречки за банките за обезбедување реструктурирање на обврските на нивните клиенти. Од претставниците на банките беше истакнато дека угостителскиот сектор и натаму може да смета на поддршката од банките во надминувањето на последиците од корона-кризата и дека дел од банките веќе преземаат активности со кои се доаѓа до најсоодветните можности за нивните клиенти од овој сектор, стои во соопштението од Централната банка.

Се тврди дека банките, ќе продолжат со преземањето активности на индивидуално ниво кон клиентите од угостителскиот сектор. 

„На предлог на тимот на Народната банка, НУК ќе продолжи со директна комуникација со банките, а во случај на потреба, заеднички ќе организираат дополнителни средби и помеѓу банките, Комората и угостителите, заради изнаоѓање натамошни решенија за финансиска кредитна поддршка во интерес на двете страни. Во зависност од натамошниот развој на настаните, доколку постои потреба ќе се разгледа и можноста за дополнителни мерки и активности коишто ќе овозможат надминување на привремените отежнати услови на работење на најпогодените сектори, велат од Народната банка.