Уставен суд за најмногу дваесетина дена ќе одлучи за предметите на СЈО
Објавено во: Македонија 20 Ноември, 2019
За најмногу дваесетина дена а најрано следната недела Уставен суд ќе донесе одлука околу предлогот за измени на членот 352 во Кривичниот законик за кој се бара поголема одговорност за оние што директно ги организираат јавните набавки, а истовремено помала за функционерите, така што на голем број обвинети во предмети на СЈО би им се намалила казната и на крајот неформално би можеле да бидат амнестирани. Клучно во оваа иницијатива е што доколку помине во Уставниот суд дел од предметите на СЈО би застареле
Деветмината уставни судии вчера неколку часа зад затворени врати на колегиум дебатираа околу предлогот за измени на членот 353 во Кривичниот законик кој се однесува на злоупотребата и малверзациите при јавните набавки сторени од државни функционери, а според извори на Гласот на Америка во Уставниот суд, предметот добил одобрение да се најде на наредната или на седницата по неа.
„Со колегите имавме исцрпна дискусија. Одлучивме предметот да го ставиме на јавна расправа на првата или втората седница на Судот. Мислам дека тоа ќе се случи најдоцна за дваесетина дена. Јавноста ќе биде присутна а не би сакал да прејудицирам каква ќе биде одлуката“, вели изворот.
Инцијативата е поднесена од адвокатот Еленко Миланов, кој застапува неколку поранешни функционери обвинети во случаите кои ги водеше СЈО, со негово образложение дека членот е спротивен на препораките на ЕУ. До сега имаше обид и во Собранието да се укине овој член од законот, но по реакции од јавноста, иницијативата беше стопирана.