ВЕРСКИТЕ ЛИДЕРИ ПОВИКАА НА ВАКЦИНАЦИЈА ПРОТИВ КОВИД: „Подобро да се спречи, отколку да се лечи“

Добивај вести на Viber

По состанокот со министерот за здравство, Беким Сали, поглаварите на верските заедници ги повикаа граѓаните, пред се своите верници да се вакцинираат против корона вирусот, со што ќе придонесат го зголемување на опфатот на вакцинација, а со тоа и стекнување колективен имунитет.

Потребата од вакцинација, како што нагласи Сали е од огромно значење и граѓаните треба сериозно да ја сфатат.

-Во време на пандемија кога речиси секој од нас е погоден од вирусот, кога дел од нас изгубивме наши драги и најблиски, посакувам на овој заеднички начин да упатиме секој граѓанин да ја сфати сериозно потребата за вакцинација, да одговори на нашиот повик за вакцинација и да не дозволи никој да ги поколеба во стремежот за спасување на својот и на животот на луѓето околу нас, од оваа чума која веќе две години го смени и начинот на нашето живеење. Ја користам оваа прилика заедно со челниците на верските заедници да им се заблагодарам за оваа благородна иницијатива и уште еднаш да ве повикам сите да се вакцинирате, убеден дека ова е најбезбеден начин за заштита од вирусот и единствениот начин за спречување на ширењето на инфекцијата, затоа ве молам вакцинирајте се, нагласи министерот.

Поглаварот на Исламската верска заедница, Шаќир Фетаху изјави дека уште на почетокот на епидемијата во Македонија ги почитуваат сите препораки од Светската здравствена организација, нагласувајќи дека постојано апелираат до нивните верници да се придржуваат до мерките.

- Апелирањето беше не само преку ИВЗ туку се апелираше во сите џамии, на секоја петочна молитва, во сите меџлиси, групи и слично, и мислам дека тоа беше многу успешна работа. Што се однесува пак до вакцинацијата, ИВЗ имаше наредба кај сите верници вакцинацијата да се зема сериозно затоа што тоа е одлука на Светската здравствена организација, нагласи Фетаху.

И МПЦ на разни начини, изминатиот период апелираше до верниците да ги почитуваат сите мерки за заштита од корона вирусот, нагласи поглаварот на МПЦ г.г. Стефан, истовремено кажувајќи ја добро познатата изрека: Подобро да спречиме, отколку да лечиме.

МПЦ преку соопштенија повеќепати во изминативе две години како и во посланијата за поголемите празници апелираше до верниот народ да се придржуваат на она што институциите апелираа. И овој пат ќе кажам, подобро е нешто да го спречиме отколку да го лечиме. Овој апел така треба да се разбере, упатен е до сите верници, изјави г.г. Стефан.