Владата апелира побрзо да се искористи можноста за бесплатни елаборати за легализација

Добивај вести на Viber

Граѓаните од социјално ранливите категории што поскоро да ја искористат можноста и да си обезбедат бесплатен елаборат за легализација на бесправно изградените објекти, апелираат од Владата. Сите лица корисници на социјална или постојана парична помош, како и лицата кои имаат ниски примања веќе може да ги поднесуваат барањата за изготвување на бесплатен елаборат. Процедурата е едноставна и има нула трошоци, вели владиниот портпарол Александар Ѓорѓиев. „Лицата кои се корисници на социјална парична помош или на постојана парична помош, треба да извадат само потврда од Центрите за социјална работа дека се корисници на такво право и истата таа потврда да ја однесат во Агенцијата за Катастар за недвижности на шалтер каде што ќе им биде доставен образец да го пополнат, да го пријават своето барање, да го запишат и бројот на поднесокот за основната легализација и потоа во соодветен период ќе се реализира изработката на елаборат од страна на државниот Катастар“, додава тој. Лицата пак, кои не се корисници на социјална или постојана парична помош, но се лица со ниски примања до 168 илјади денари годишно на ниво на домаќинство, треба да извадат потврда од страна на УЈП и по истата процедура да ја достават до Катастарот. Рокот за оваа можност трае до 31 декември 2015 година, но Владата апелир можноста поскоро да се искористи за лицата да можат конечно да ги легализираат своите домови.