Владата го објави повикот за пријавување до надворешни експерти за преговори со ЕУ

Владата објави јавен повик за пријавување на надворешни експерти кои можат да помогнат во процесот на објаснувачки скрининг и процесот на преговори за пристапување на Македонија кон Европската унија. Пријавувањето е до 10 октомври.

Целта на овој повик е да се создаде официјален регистар на стручњаци на кои Владата ќе може да смета во текот на скринингот и процесот на преговори за пристапување и кои ќе може да ги ангажира повремено, привремено или постојано, на пократок или подолг рок.

Сите заинтересирани лица можат да се пријават за едно или повеќе поглавја од правото на ЕУ, односно подрачја, теми и поттеми во рамки на поглавјата од правото на ЕУ.

Се работи за 33 поглавја од кое секое покрива специфична област на политики и за кое се преговара посебно. Преговорите помагаат државата-кандидат да се подготви за исполнување на обврските кои произлегуваат од членството во ЕУ. Тие исто така ѝ помагаат на ЕУ да се подготви за проширувањето во однос на капацитетот за интеграција.

Предмет на преговорите се само условите и временската рамка за прифаќање, имплементација и спроведување на севкупното ЕУ законодавство (acquis) од страна на државата-кандидат. Исто така во текот на пристапните преговори се дискутира и за: финансиски спогодби (на пр. колку новата држава членка ќе контрибуира, односно користи средства од буџетот на ЕУ, во форма на трансфери), како и преодни аранжмани.

Европската комисија спроведува детално испитување заедно со државата-кандидат за секоја област на политика (поглавје), со цел да одреди колку добро е подготвена државата, а во игра се и преговарачки позиции за затворање на поглавјата.