Владата најавува царински мерки за странските извозни компании
Објавено во: Економија 26 Октомври, 2020
Владата ќе донесе автономни мерки за помош на извозните компании, најавија денеска вицепремиерот за економски прашања Фатмир Битиќи и министерот за економија Крешник Бектеши. Битиќи вели дека ќе има измени на царинските стапки и дека набрзо ќе се отвори целиот царински тарифник па заради праведливост, вели, ќе се усогласи со тој од Европската унија.
„Треба да го средиме царинскиот тарифник и да ги усогласиме царинските стапки за увоз на компоненти со тие на Европската унија. Имаме барање и предлог од советот на странски инвеститори и деновиве ќе одлучиме позитивно за автономна мерка за намалувањее на царинска тарифа се додека трајно не се реши како проблем, рече Битиќи.
Министерот Бектеши потврди дека во Министерството за економија се подготвени веќе одлуките за соодветни мерки, за израмнување на царински стапки со тие на Европската Унија.
Странските инвеститори инаку сметаат дека е потребно итно и неодложно целосно одложување на царинските стапки на одделни производи односно компоненти потребни за производство на технолошки напредни производи со соодветните стапки во Европската Унија согласно Одлуката за намалување на увозните давачки- царинските стапки на оддлени компоненти. Барањето беше за да се зголеми конкурентноста на нашите компании.
Со одлука која беше со важност од 30 јуни годинава беа намалени стапките на 12 производи за 50 отсто, но и покрај барањето Владата не ја продолжи важноста на оваа одлука.
„Како држава имаме поголеми царини за увозот на многу компоненти што се потребни за производство на технолошки напредни производи од оние кои се применуваат за увоз од трети земји во ЕУ. Ова ја прави земјата неконкурентна како локација за инвестиции за другите земји членки од ЕУ и земјите од регионот и дополнително ги прави неконкурентни македонските производи во споредба со земјите членки на ЕУ, тврдеа од странските компании.
А.Т.