Влатко Ѓорчев: Предноста на Македонија кон Албанија е однесувањето на опозицијата

Добивај вести на Viber

Пратеникот од редовите на ВМРО-ДПМНЕ, Влатко Ѓорчев, анализирајќи ја ситуацијата по средбата на премиерот Зоран Заев и канцеларката Ангела Меркел во Берлин, оцени дека предноста на Македонија во однос на Албанија за добивање на датум на преговори до есен е затоа „што нашата земја има кооперативна опозиција“.

- Гледаме каква е ситуацијата во Албанија, каде што опозицијата се однесува агресивно и вонпарламентарно. Во Македонија ситуацијата е целосно различна. Опозицијата е во Собранието и заедно со власта носи реформски закони и соработува. Тоа е разликата кај двете земји - рече Ѓорчев во синоќешното гостување на 1ТВ.

И лидерот на ВМРО-ДПМНЕ, Христијан Мицкоски, како гостин во студиото на Алфа ТВ по средбата на Заев и Меркел рече дека ќе му предложи на Извршниот и на Централниот комитет на партијата со сиот свој потенцијал на ниво на висок дијалог да работи со Владата за надминување на сите пречки што стојат на патот на Македонија за  во октомври да добие датум за преговори.

– Интересот на граѓаните и на државата е пред се и над се и така треба да се однесуваме. Ако гледам лично, партиски, да, можеби сега е моментот кога ВМРО-ДПМНЕ треба да излезе и да побара предвремени паралментарни избори и да победи. Но, дали таа победа ќе ја оддалечи нашата земја за уште една изгубена година до следниот датум кога треба да се одлучува за евентуален датум за преговори, се ризиците што постојат – рече Мицкоски и додаде дека треба да се работи за иднината на државата.