ВМРО-ДПМНЕ КРИТИКУВА: СДСМ удри по џебот на граѓаните
Објавено во: Македонија 03 Април, 2018
Опозициската ВМРО-ДПМНЕ ја критикува власта. Според нив,економијата во Македонија стагнира, додека низ регионот и низ Европа бележи раст.
„СДСМ ја зароби државата, а со тоа и целото општествено – економско работење падна на колена. Република Македонија ја заврши 2017 година без раст на БДП. Државата после долг период не бележи раст и тоа е само поради неспособноста на актуелната влада. СДСМ не работи за граѓаните, туку за тесно партиските интереси и елитите од Бихаќка. Секое македонско семејство од почетокот на година е задолжено за нови 1.200 евра. Нов долг има, раст нема. Инвестиции воопшто. Ова го има само во Република Македонија под водство на СДСМ“, велат од ВМРО-ДПМНЕ.
„Немилосрдното задолжување на идните генерации е пропратено и со покачување на акцизата на нафтените деривати за 3.5 денари. Ова не беше доволен удар по џебот на граѓаните, па власта се реши на покачување на персоналниот данок на доход од 10% на 18%. Или буквално кажано задолжувањето на СДСМ од кое граѓаните немаат никаков бенефит, ќе го враќаат токму граѓаните преку повисоки даноци. Фијаското на економски план и целата безидејност, СДСМ го покрива со дефокусирање на јавноста преку политичкиот прогон на неистомисленици“, додаваат од ВМРО-ДПМНЕ.