ВМРО-ДПМНЕ поднесува закон за поголеми пензии
Објавено во: Македонија 16 Октомври, 2019
ВМРО-ДПМНЕ денеска во Собранието ќе поднесе предлог закон за изменување на Законот за пензиско и инвалидско осигурување, со кој бараат да се врати старото законско решение што ќе овозможи кога било и колку било да се зголемуваат пензиите на пензионерите.
„Со овие законски измени што ги предлагаме ќе се укине штетниот закон кој го донесе СДСМ со кој им се скрати правото на поголема пензија од околу 500 денари на над 310 илјади пензионери“, рекоа од пратеничката група на најголемата опозициска партија.
Од таму сметаат дека со законските измени на владеачкото мнозинство се вршело усогласување на пензиите, но не и реалното зголемување.
-Со Предлог законот за изменување на Законот за пензиското и инвалидското осигурување што го поднесуваме се врши враќање на предходното законско решение со кое се вршеше усогласување на пензиите на многу поповолен начин отколку со измените кои што ги спроведе Владата на СДСМ во овој закон – изјави Слаѓана Митовска, пратеничка од ВМРО-ДПМНЕ.
Од таму ги повикаа колегите од парламентарното мнозинство да го прифатат овој предлог закон.
Премиерот Зоран Заев пред десетина дена во Штип во рамките на кампањата „На прав пат“ нагласи дека следната година пензионерите ќе добијат „огромно“ зголемување на пензиите, но дека тоа ќе биде на основа на еконосмкиот раст. „Не се одлучивме да делиме по 500 денари пред избори - пред локални и претседателски, туку за стабилизирање на фондот и поврзување со раст на економија. Во 2020 ќе има огромно покачување на пензиите и тоа без да биде загрозена иднината на пензионерите“, рече премиерот.