Во 2020 вкупно одобрени биле околу 180 милиони евра за спас на фирмите од Ковид-19, најмногу давала Владата

Добивај вести на Viber

Државата со околу 180 милиони евра севкупно ги помогнала претпријатијата, односно стопанството, во справувањето со Ковид-19 во текот на 2020, доколку се земат посебните ставки за доделување на државна помош што ги објави Комисијата за заштита на конкуренцијата во годишниот извештај.

Владата одвоила најмногу пари и за неа биле одобрени директни исплаќања на 146 милиони евра од вториот сет мерки како „финансиска поддршка на правните субјекти од приватниот сектор погодени од здравствено-економската криза предизвикана од вирусот КОВИД-19“.

На второто место е Министерството за труд и социјална политика за субвенционирање на исплатата на придонеси од задолжително социјално осигурување за време на вонредна состојба. Биле одобрени 7.851.220 евра за исплата на придонесите на фирмите кои би се одлучиле за оваа помош, наместо за помош за исплата на нето-плати.

На Фондот за иновации и технолошки развој му биле одобрени кофинансираните грантови за надминување на последиците од КОВИД-19 во висина од 3.252.033 евра, а за Министерството за економија била прифатена уредбата за финансиска поддршка за зајакнување на конкурентноста на компаниите во текот на пост КОВИД 19 од 19,5 милиони евра, иако не е познато кога овие пари треба да се исплатат. За Министерството за економија во овој контекст била прифатена и предлог-програмата за конкурентност, иновации и претприемништво од  650,5 илјади евра.

Вкупно од три наврати во висина од 2.870.000 евра биле планираните бескаматни кредити на Развојната банка за претпријатијата. Агенција за млади и спорт за помош на спортисти дала 487,8 илјади евра како мерка за справување со коронавирусот, додека Министерството за култура за регистрирани уметници планирало исплата од 66,4 илјади евра.

Станува збор за вкупната сума на одобрена планирана државна помош за 2020 година од страна на комисијата, а очекувано најмногу пари се исплаќале во категоријата за планирано доделување на државна помош за отстранување на потешкотиите во домашното стопанство а со цел справување со состојбата предизвикана од епидемијата на коронавирусот КОВИД-19.

„Поради светски настанатата здравствено-економска криза предизвикана од вирусот КОВИД-19, се доделувала државна помош преку реализирање на проекти со кои се отстрануваат потешкотиите во домашното стопанство. Беа реализирани поголем број на проекти од страна на давателите на државната помош  поврзани со надминувањето на последиците од КОВИД-19“, велат од Комисијата за заштита на конкуренцијата.

А.К.