Во Атина се гради џамија - Златна зора ќе протестира

Добивај вести на Viber

Половината милион муслимани кои живеат во Атина наскоро треба да ја добијат првата официјална џамија по повеќе од стотина години.

Новата џамија, зграда со површина од 1.000 квадратни метри без минарето, би требала да биде довршена во април годинава во старата поморска база во индустрискиот дел на Атина. 

„Имаме потреба од џамија за нашата нова генерација, за нашите млади,  за да се чувствуваат еднакви пред законот, еднакви во општеството“- изјави портпаролката на Здружението на грчките муслимани,  Ана Стамоу, Гркинка која преминала во ислам.

Критичарите на ваквиот потфат, предупредуваат дека презадолжената земја не може да си дозволи најмалку 800.000 евра, колку што чини изградбата на џамијата.

Атина нема службена џамија откако во 1833 година се протерани муслиманите и е единствената таква престолнина во Европската унија, па и на континентот, како што лани предупреди во парламентот министерот за надворешни работи, Јоанис Аманантидис.

Муслиманите се молеа на различни импровизирани локации, во подрумски простории или напуштени складишта каде што се жалат дека се често напаѓани од националистите.

Премиерот Алексис Ципрас изјави ланскиот мај дека веќе одамна било време да се изгради џамија. Владата тоа ќе го стори „од почитување кон муслиманските жители на градот, но и затоа што има обврска активно да ги штити своите вредности“, рече тој. 

Ултрананционалистичката партија Златна зора, која е третата според рејтингот меѓу грчките избирачи, смета дека муслиманите го оптоваруваат државниот буџет во време на длабока финансиска криза. Други, од нив, пак, џамијата и натаму ја поврзуваат со Турција, вечниот регионален непријател на Грција.

Повеќе десетици грчки националисти минатата година со месеци се собираа на просторот на кој се гради џамијата и подигнаа на тоа место центар за бездомници. „хот спот за Грците“, правејќи паралела со центрите на грчките острови за муслиманските беглаци и имигранти кои доаѓаат преку Турција .

Претставниците на Златна зора повторно најавуваат протести овие денови.