ВУЧИЌ ДО КЛАРК: Србија никогаш повеќе нема да биде ничиј плен, како во 1999 година!

Добивај вести на Viber

Српскиот претседател Александар Вучиќ вели дека Србија не е и нема да биде плен како во 1999 година. Вучиќ му одговори на некогашниот американски генерал Весли Кларк, кој во интервју за Си-Ен-Ен синоќа ја обвини Србија дека бара руска поддршка и овластување за територијално да се прошири на Косово и да почне нова војна на Балканот.

„Морам да кажам дека никого не допираме, но Србија никогаш повеќе нема да биде ничиј плен, како во 1999 година! Денес Србија е сериозна и одговорна земја, сака мир, но нема да дозволи никој да му ја загрозува слободата на нашиот народ“, нагласи Вучиќ.

Српскиот претседател вели дека Србите не се ничии пиони. 

„Бидејќи не сме Руси, ниту Американци. И никогаш нема да бидеме. Тука живее слободарски народ, кој ја ценел и загинал за својата слобода. Слободата е најскапоцена и добро би било тој (Весли Кларк) да ја совладаше таа лекција и во 1999 година. Но, на некои луѓе им проаѓа цел живот, а не ги учат лекциите. Србија не ѝ служи на ниту една голема сила, туку само на својот народ“, рече Вучиќ.

Српскиот премиер Милош Вучевиќ реагирајќи на изјавата на косовскиот премиер Албин Курти за Си-Ен-Ен порача дека Србија не прекршува ниту еден меѓународен договор, документ, ниту резолуцијата 1244 на Обединетите нации, а воените бази на српската армија со години се наоѓаат на истото место, јави дописникот на МИА од Белград.