За тоа кои земји го блокираа стартот на преговорите детали открива „Ле Монд“
Објавено во: Македонија 20 Јуни, 2019
Парискиот весник „Ле Монд“ пишува дека Франција, Германија и Холандија се земјите кои го блокирале почетокот на преговорите за членство во ЕУ за Албанија и Северна Македонија, за време на министерскиот состанок во Луксембург.
Овие три земји во Луксембург не се согласиле за решение кое за нив би било премногу симболично доколку се одобреле преговори за пристапување за двете балкански земји.
Весникот наведува дека прашањето за проширување на ЕУ останува предмет на поделба меѓу земјите-членки, а тие повторно ќе разговараат за можна одлука во октомври.
„Фактот дека германскиот Бундестаг уште не одлучил по препораката на Европската комисија за преговори со Скопје и Тирана, е добар изговор за колебливите земји-членки да не донесат одлука“, додава францускиот весник.
Како што се наведува, холандскиот Парламент ја отфрлил идејата за каква било одлука за Албанија во 2019 година.
Кога станува збор за Франција, нејзината позиција е дека нема да има проширувања без претходна подлабока интеграција внатре во ЕУ блокот.
Се додава и дека ова прашање бара едногласност на сите 28 членки на Унијата.