(ФОТОГАЛЕРИЈА) ЗАЕДНИЧКИ ЧАС ВО ЧЕСТ НА ЖРТВИТЕ - Студентите од УКИМ со солзи во очите палеа свеќи за загинатите лица од Кочани

Добивај вести на Viber

Страотниот пожар во дискотеката „Пулс“ во Кочани кој однесе 59 животи на млади лица, од кои дел и малолетници ја расплака цела земја. 

Во чест на оние чии животи прерано згаснаа, во страшна несреќа, која не требаше да се случи, денеска студентите се собраа на платото на УКИМ, каде беше одржан Заеднички час на студенти и професори во спомен на жртвите во пожарот во Кочани. 

Во прилог ви пренесуваме фотографии од нашиот Вангел Тануровски.

Собирот беше организиран од студентската организација на Скопскиот универзитет. Настанот закажан за точно напладне  беше одложен половина час поради силен дожд, а потоа почна со седумминутен молк на големиот број присутни студенти со кој беше исполнет кампусот на УКИМ.

Студенти во редици чекаат да запалат свеќи за покој на загинатите во пожарот, да положат цвеќе и да остават пари за поддршка на семејствата во кутиите за донации пред Филозофскиот факултет. Донираните средства ќе бидат предадени на Црвениот крст. Пред Правниот факултет, пак, е отворена Книга на жалост.

Вакви собири напладне ќе се одржуваат и во наредните четири дена.

Претседателот на УСС на УКИМ Александар Николовски соопшти дека утре ќе се одржи на кампусот на техничките факултети, в среда на ПМФ, во четврток пред Педагошкиот факултет, а за петок ќе биде организиран марш низ Скопје или студентите и сите заинтересирани граѓани ќе се упатат кон Кочани.