ЗАЕВ И БЕСИМИ ЌЕ КАЖАТ КОЛКУ ТЕЖИ БУЏЕТОТ ЗА ИДНАТА ГОДИНА - Владата ја скроила државната каса

Добивај вести на Viber

Владата на Република Северна Македонија синоќа го утврдила Предлог-буџетот на земјава за 2021 година, како и Предлог-законот за извршување на Буџетот за 2021. Од Владата соопштуваат дека буџетот ќе биде доставен во Собранието и деновиве ќе биде детално презентиран пред јавноста. 

Владата во соопштението не кажува колку ќе тежи буџетот за идната година. Тоа веројатно ќе го кажат премиерот Зоран Заев и министерот за финансии Фатмир Бесими, кои за денеска токму на тема буџет најаваија прес конференција за 14 часот.

Од Владата само соопштија дека ја разгледале и усвоиле Информацијата за реализација на мерката за финансиска поддршка за зајакнување на конкурентноста на деловните субјекти во текот и во пост КОВИД-19 периодот и го разгледа и го усвои Извештајот на Kомисијата за оцена на пријавите на деловните субјекти, задолжувајќи го Министерството за економија да склучи договори со одобрените компании согласно Извештајот.

Вкупно 17, 2 милиони евра, средства кои се дел од третиот пакет мерки, наменети за опоравување на домашната економија за време на здравствено-економската криза ќе ги добијат 400 компании, со цел амортизирање на ударот врз домашните погодени бизниси преку стимулирање на приватната потрошувачка со фокус на домашната понуда, директна финансиска поддршка и поддршка за ликвидноста на приватниот сектор и работните места. 

Висината на финансиската поддршка е 25 % од реализираната инвестиција според инвестицискиот план, но не повеќе од: 

40.000 евра во денарска противвредност, за деловни субјекти кои оствариле вкупен приход во 2019 година, не повисок од 1.000.000 евра во денарска противвредност;
100.000 евра во денарска противвредност за деловни субјекти кои оствариле вкупен приход во 2019 година, од 1.000.001 евра до 10.000.000. евра во денарска противвредност;
140.000 евра во денарска противвредност за деловни субјекти кои оствариле вкупен приход во 2019 година од 10.000.001 евра до 50.000.000 евра во денарска противвредност;
200.000 евра во денарска противвредност за деловни субјекти кои оствариле вкупен приход во 2019 година, од 10.000.001 евра, повеќе од 50.000.000 евра во денарска противвредност.
Детални информации за доделувањето на финансиската помош ќе бидат презентирани во јавноста од претставници на Владата во наредните денови.