Заев: Иванов нема да има време за да аболицира
Објавено во: Македонија 11 Април, 2019
Премиерот Зоран Заев денеска пред медиумите рече дека претседателот на државата Ѓорѓе Иванов нема да има време кога да ги аболицира осудените за „27 април“. Ваквиот коментар на шефот на Владата следува откако од пред една недела од Кабинетот на претседателот потврдија дека адвокати на осудените поднеле барање за помилување.
- Членот 11 од законот за помилување не постои, постапките кои се водат преку министерството за правда не може да се водат за време на избори, тие може да стигнат кај Иванов од 7 мај, а тој е до 12 мај - рече Заев.
Тој додаде дека не очекува тоа да го стори ниту кандидатот за претседател поддржана од ВМРО-ДПМНЕ, Гордана Силјановска Давкова, доколку победи на претседателските избори, затоа што, како што вели Заев, ветила дека нема да аболицира никого.
За судбината на СЈО вели дека предметите „се живи“ и дека тие се распределени по судии и обвинители. Од последната средба со опозицијата за законот за јавно обвинителство договорено е состаноците да продолжат
- „Бомбите“ како докази се предвидени во самиот закон, но мора да има и материјални докази. Преговорите течат, мора да има решение ако се мисли на државата. Тој закон е важен заради правосудните реформи и европската интеграција - вели Заев.
За судбината на „бомбите“ кои мора да се уништат вели дека системот е таков и дека одлуки се носат со двотретинско мнозинство во Собранието.
- Фантастични очекувања кои не се реални, самиот систем е таков што за тоа се носи одлука со двотретинско мнозинство. Еден дел одлулчиле за мене да гласаат и имам 49 пратеници, но има и опозиција со која треба да се најде компромис. Договорено е уште во Пржино да бидат 18 месеци користени. Преку 70 итсто од разговорите се приватни. Јас ги предадов комплетно сите. Објавував разговори во кои има само криминал. Не сум ниту судија, ниту обвинител. Секоја истрага за која има и индиции треба да заврши со докази, не може да има сомничење без докази и да има одлука за тоа. Јас само сакам да му дадам правец и иднина на СЈО зошто има изграден капацитет - изјави премиерот.