Заев: Ќе преговараме со Хрватска за сервисирање на противпожарните авиони
Објавено во: Македонија 07 Август, 2021
Премиерот Зоран Заев денеска пристигна на местото на опожарените подрачја во беровско и за МРТ рече дека постои недостаток на лиценцирани компании во регионот за лиценцирање на противпожарните авиони, поради што ќе се направи обид за директно преговарање со владата на Хрватска.
- Овие денови побаравме можност преку Бирото за јавни набавки по пат на преговарање да се ангажираат најблиските фирми и да преговараме директно влада со влада со Хрватска затоа што нивните воени служби ги имаат лиценците и можноста да го направат сервисирањето на авионите и дефинитивно секогаш кога ќе ни се случуваат вакви непогоди да бидеме навремено подготвени, рече Заев.
Заев додаде дека ветрот не му дава можност на огнот да се стиши во овој регион и дека се прават заштитни обрачи околу населените места. Додаде дека се прават дополнителни вештачки резервоари за да не се губи време евентуално подоцна и дека механизацијата прави продорни патишта.
Изминатиот период најголемо жариште на огнената стихија е во радиус од 50 километри околу Берово, Пехчево и Делчево.