Заев: Ќе успееме на референдумот и покрај одложениот Датум за преговори

Добивај вести на Viber

Премиерот Зоран Заев истакна дека Македонија ќе ги испорача потребните резултати на референдумот за да успее договорот од Преспа помеѓу Скопје и Атина и покрај тоа што добиениот Датум за преговори со ЕУ не важи од оваа година, туку од 2019-та доколку се спроведат потребните реформи во правосудството и борбата со корупцијата и организираниот криминал. 

„Ќе останам силно посветен до крај. Со сите аргументи кои ми стојат на располагање ќе докажувам и презентирам дека Договорот со Грција е историски, и дека датумот за почеток на преговори е добро заслужен и ќе биде ефектуиран во јуни 2019 година.

Противниците се оние политички фактори во земјата кои, без никаква аргументација, ги негираат придобивките и сакаат да се вратат на авторитарните политики во време кога мнозинството граѓани во нашата земја и во земјите од Западниот Балкан сакаат да им се приклучат на ЕУ и НАТО. ЕУ го понуди вистинскиот импулс со прецизна и единствено можна одлука - датум за почеток на преговори со Република Македонија.

Со сета моја мотивација, останувам цврсто и целосно посветен да го докажам фактот дека овој Договор со Грција го решава нашиот најголем проблем кој го спречуваше нашиот развој уште од независноста.

Добивме кристално чиста потврда за македонскиот јазик и македонскиот идентитет. Македонци, Македонско, дома и надвор. Преводливо, без никакви ограничувања, на сите светски јазици. Идентитет за севкупна употреба. Оние политички фактори кои не можат ова да го видат создаваат нови поделби. На Република Македонија тоа веќе не ѝ е потребно. Треба да се обединиме околу оваа нова историска можност. Верувам во тоа, и ќе ги инвестирам сиот свој политички интегритет и енергија. Знам дека ќе успееме, Македонија беше и ќе биде успешна, а граѓаните ќе добијат многу од овој успех“, вели Заев.

Тој додаде дека во просек на една земја и се потребни седум години за да ги имплементира поглавјата и да биде примена во ЕУ откако ќе добие Датум за преговори. Смета дека договорот од Грција нема да се изјалови кај нашиот јужен сосед, иако таму во моментов според анкетата, поголема доверба кај граѓаните има опозицијата отколку власта.

„Фактот што опозициите во обете земји се против Договорот покажува дека сме постигнале добар компромис меѓу народите на двете земји. Граѓаните на Република Македонија добија целосно признавање на македонскиот идентитет на сите полиња, а граѓаните на Грција добија признавање на елинистичкото наследство од античкиот дел на историјата.

Политичките партии од обете земји имаа шанси да го решат овој спор со децении, но не сторија ништо. Напротив, само ги засилуваа разликите. Сега, соочени со фактот дека решение е можно и дека тоа решение е еднакво прифатливо за двете страни, тие одбраа да се противат, наместо да прифатат дека ова е единствениот начин за двете земји да тргнат напред“, вели Заев