Заев: ВМРО- ДПМНЕ си прави излет на мозокот, ние ќе имаме уште 6 пратеници
Објавено во: Македонија 15 Октомври, 2020
Си ја имаат мувата на капата и си прават излет на мозокот. Вака премиерот Зоран Заев ја коментираше денеска изјавата на потпретседателот на ВМРО-ДПМНЕ Александар Николоски кој синоќа тврдеше дека има пратеници од коалицијата на СДСМ, коишто веќе разговараат за ново парламентарно мнозинство. Николоски тврдеше дека тие пратенции не се од албанска националност односно не се од Беса или од ДУИ.
„На која политичка основа ќе формираат ново парламентарно мнозинство, а без албанска партија? Со кој ќе формираат мнозинство? А што - ќе поништуваат преспански договор, договорот со Бугарија и ќе формираат чиста Македонија? Мислам дека додека не ја променат менталната матрица ќе останат во опозиција. Инаку еве да ви кажам меѓу 3 и 6 пратеници ќе дојдат во нашето парламентарно мнозинство и тоа заради политиките и предлог решенијата. Да си бидеме посветени, еве гледате златни мерки има, економија, инвестиции, рече Заев.
Инаку синоќа Николоски во гостување на телевизија Стар рече дека со пратеници од коалицијата на СДСМ разговараат за ново парламентарно мнозинство.
„Во овој момент, еве ексклузивно има пратеници од коалицијата на СДСМ, кои што не се од Беса или од ДУИ туку од останати пратеници во рамки на коалицијата на СДСМ коишто веќе разговараат за ново парламентарно мнозинство, рече Николоски.
„Не сум приврзаник на вонредна состојба иако така полесно се носат одлуки. Верувам дека ќе се понесе одговорност и од власта и од опозицијата и Парламентот ќе работи онлајн дали целосно или само тие пратеници што ќе бидат позитивни, рече Заев.