Заев во Атина: Вчера другаруваше со Ципрас, ама денеска „ќе пее“ кај Мицотакис
Објавено во: Македонија 16 Септември, 2020
Денеска е вториот ден од посетата на премиерот Зоран Заев и владината делегација што ја предводи во Атина во рамки на Конференцијата на „Економист“, а на агендата е средба со претседателот на грчката влада Киријакос Мицотакис, но и со претседателката на Грција, Катерина Сакеларопулу
Од она што до сега пренесоа грчките медиуми, Мицотакис ја коментираше посетата на Заев единствено во контекст на Спогодбата од Преспа. Според Мицотакис, „договорот е затворен, но не е затворена неговата соодветна имплементација“ и овие прашања ќе бидат дискутирани на денешниот состанок на двајцата премиери.
Вчера Заев, заедно со поранешниот француски претседател Франсоа Оланд му беа гости на лидерот на Сириза, Алексис Ципрас. Тој во својот говор во рамки на дискусијата рече дека „Грција повеќе нема проблеми со северната граница како што има со источната“, алудирајќи на тензичниот спор со Турција и дека и оние кои се противеле на Преспанскиот договор сега ја разбрале неговата важност.