Заев во Косово со писмо од семејствата на обвинетите терористи од „Диво Насеље“
Објавено во: Македонија 12 Декември, 2017
Во пресрет на првата официјална посета на премиерот Зоран Заев на Косово до него е испратено отворено писмо од страна на семејствата на обвинетите за тероризам во случајот „Диво насеље“.
Тие му пишуваат на премиерот во надеж дека заедно со политичките лидери на Косово, меѓународниот фактор и правните органи ќе успеат да ги расветлат сите мистерии кои се поврзани со крвавата битка која одзеде 8 животи на македонски полицајци, како и на 10 припадници на вооружената група обвинета за тероризам.
Според семејствата борците кои дошле од Косово се патриоти со силно национално чуство, но тие биле изманипулирани од страна на политичките струи и не се виновни за тероризам, па затоа од премиерот Заев бараат помош да се најде решение преку обновено судење и избегнување на казната доживотен затвор.
Точните мотиви на вооружената група од Косово помогната со борци и од кумановскиот крај никогаш точно не беа утврдени во текот на судската постапка бидејќи тие тврдеа дека немале намера да извршат терористички напади, туку да испратат политичка порака и дека биле измамени.
Сомнежите на македонските истражни власти пак, се дека главна цел на вооружената група било изведување на напади врз државни институции, како и на цивилни цели со можност за герилски и терористички акции.