Заев за Фактор: Работникот од јавниот сектор да му помогне на работникот во приватниот

Добивај вести на Viber

Во однос на прашањето за тоа каков ефект имаат жестоките реакции од синдикатите, според кои предложените мерки од страна на СДСМ ќе ги погодат најсиромашните слоеви од јавниот сектор, лидерот на партијата Зоран Заев во интервјуто за Фактор вели дека ако убаво се погледнат мерките може да се види сосема спротивното:

-Целта на нашите мерки е да се спречи губење на работни места, да се спречи луѓе да немаат приход, да останат и без работа и без егзистенција, но и да не се загрози одржливоста на буџетот.  Целата оваа ситуација, прво со здравствената, а потоа и со економската криза од коронавирусот, не е пријатна за никого. Јасно е дека никој не сака да му се нарушат редовните месечни примања, но затоа секој треба да сфати дека со ова дел од товарот носиме сите, но воедно им помагаме и на оние кои поради тоа што не работат заради коронавирусот, се соочени да не добијат никава плата во следните месеци. Мораме да мислиме на сите, и тие да добијат барем минимална плата, за да имаат што да трошат, да си обезбедат храна за себе и своите семејства во овие кризни времиња, истакнува Заев во интервјуто за Фактор.

Смета дека сега е време за солидарност, секој да помогне на секого. Работникот од јавниот сектор да му помогне на работникот во приватниот, на пример. Затоа што администрацијата се финансира доминантно од приватните бизниси.

-Никој не може да дознае колку кризата ќе трае и какви последици ќе остави врз светската економија. Затоа, подобро е два месеци да се издржи и да се стиснат заби, отколку да се доведеме во ситуација, државата да нема пари да ги финансира основните функции.  Повторно ќе кажам, време е за солидарност, време е секој од нас да помогне во надминување на кризата, а најголем дел од товарот секако да понесат оние најбогатите, вели Заев.