Захариева вели дека Македонија треба да се реформира

Добивај вести на Viber

Екс бугарската министерка за надворешни работи, Екатерина Захариева бара Договорот за добрососедство да влезе во преговарачка рамка. 

Вели дека интересот на Бугарија е Македонија да се реформира. 

Во интервју за агенцијата БГНЕС, Захариева изјави дека фокусот на Македонија не бил да започне преговори со ЕУ, туку бугарските барања да не влезат во Преговарачката рамка.

„Мојот апел до министерката Теодора Генчовска е: Не ја заборавајте Преговарачката рамка“, изјави Захариева.

Таа ја предупреди актуелната Влада да биде повнимателна во очекувањата во однос на Македонија.

„Вие знаете колку пати низ годините Бугарија подавала рака, колку пати дури сме ги затворале очите, надевајќи се дека со подадена рака, благ тон и добри намери работите ќе се сменат и ќе одат на подобро. За жал, тие не само што не одат на подобро, туку имаме еден чекор напред и три назад, не два“, објаснува Захариева.

Бугарската министерка за надворешни работи Теодора Генчовска вели дека бугарското МНР строго ќе го почитува договорот меѓу Бугарија и Македонија. 

За изјавата на бугарскиот претседател Румен Радев дека посетата на премиерот Кирил Петков на Скопје била избрзана, Генчовска одговори дека тоа е мислење на претседателот и не може да го коментира.

Генчовска истакна дека се во директен контакт со министерот за надворешни работи на Република Северна Македонија, а тимот од МНР е во директен контакт на експертско ниво. 

Бугарскиот премиер Кирил Петков на 18 јануари ја посети Македонија.