Зaев: Уште 200 милиони евра за завршување на националниот гасовод
Објавено во: Економија 06 Ноември, 2020
Премиерот Зоран Заев на денешниот увид на почетокот на изградбата на интерконекторот со Косово кај Семениште, каде што поминува магистралната линија Скопје – Тетово - Гостивар, рече дека ќе бидат потребни уште 200 милиони евра за завршување на националниот гасовод.
Ова претседателот на Владата го констатираше во разговор со директорот на Национални енергетски ресурси, Бајрам Реџепи, а на увидот присуствуваа уште министерот за транспорт и врски Благој Бочварски и министерот за економија Крешник Бектеши.
- Останатиот дел од магистралниот гасовод е 70 милиони евра, а интерконекторот со Грција ќе биде 54 милиони. Со се останато уште 200 милиони евра че бидат потребни за завршување на националниот гасовод, рече Заев.
Директорот Реџепи додаде дека за изградба на еден километар се потребни 430.000 евра по километар.
- Интерконекторот од Неготино до Гевгелија има студија за животна средина, јавни расправи се водат во општините, па потоа ќе се усвои студијата. Има инфраструјтурен и основен проект и очекувам во втора половина во 2021 да ја имаме целата документација за да почне градбата. Кичево - Охрид и Охрид - Битола ќе се проектираат следната година, реферираше првиот човек на националното претпријатие кое го гради гасоводот.
Заев рече дека интерконекторот со Косово е од исклучителен интерес за Македонија.
„Скопје-Тетово-Гостивар од 86 километри заклучно со септември е реализирана 66 отсото и очекувам да биде завршен до втората половина следната година заедно со мерните станици и краковите кон градовите. Од Клечовце до Неготино е завршена работата, додека Неготино - Прилеп - Битола е до 92 проценти, тврди Заев.
Министерот за економија Крешник Бектеши додаде дека кога се ќе биде комплетирано, Македонија ќе биде транзитна држава на природен гас за неколку соседи како Косово, Србија и Црна Гора.