Завршува изградбата на електроенергетскиот прстен околу Битола

МЕПСО ги завршува активностите за ставање во функција на новиот двосистемски 110-киловолтен далнoвод што ги поврзува трансформаторските станици „Битола 3“ и „Битола 4“. Со ставањето под напон на оваа инвестиција вредна 2,4 милиони евра во енергетски прстен ќе се поврзат сите четири трансформаторски станици поврзани на преносната мрежа во битолскиот регион со што во иднина ќе се сведе на минимум ризикот од испади, констатираа вицепремиерот Владимир Пешевски, Синиша Спасов, генералниот директор на МЕПСО и Ацо Ристески, директорот на Операторот на преносната мрежа при работната посета денеска на трасата на новиот далекувод. „Целта на новиот двосистемски 110 далекувод, кој се очекува да биде завршен до почетокот на септември оваа година, е да се подобрат напонските услови и зголеми доверливоста и безбедноста на енергетското снабдување во пелагонискиот регион“, изјави Пешевски. Тој додаде дека Владата на Република Македонија има големи инвестициски планови и проекти наменети за изградба и ревитализација на инфраструктурата во електроенергетскиот сектор. Генералниот директор на МЕПСО Спасов вели дека сега се монтираат елементите од електроопремата со која се поврзува новиот двосистемски далновод преку подземен кабел со далноводното поле во трансформаторската станица Битола 4.„Во овој проект се вложени 2,4 милиони евра и со него значајно ја зголемуваме доверливоста на мрежата“, рече Спасов. Овој далекувод е долг 10 километри, од кои 700 метри се подземен кабел што минува низ населбата нова Битола. „Првпат во својата преносна мрежа МЕПСО постави подземен кабел кој ги заменува далноводните столбови и проводните јажиња. Потребата се наметна поради тоа што трансформаторската станица се наоѓа во населба во Битола и целта беше да избегнеме да се поставуваат столбови и проводници во населено место“, соопшти Ацо Ристески, директор на ОПМ. Со реализација на овој проект целта на МЕПСО е да ги сведе на минимум ризиците од испади во овој регион и да ја зголемува сигурноста во напојувањето со електрична енергија во битолскиот регион и ги подобри напонските прилики на преносната мрежа.