Зелени ленти за соседните земји: ЦЕФТА пазарот за е-трговија вреди 1 милијарда евра
Објавено во: Економија 06 Ноември, 2020
Заеднички регионален пазар ќе донесе побрзо усогласување со регулативата на ЕУ и ќе го забрза процесот на интеграција во ЕУ за страните на ЦЕФТА. Ова е заеднички заклучок од состанокот на министрите за економија во рамки на Заедничкото претседателство на Северна Македонија и Бугарија со Берлинскиот процес за 2020 година. Со состанокот копреседаваа македонскиот министер за економија, Крешник Бектеши и бугарскиот заменик министер за економија, Стамен Јанев.
Емир Ѓикиќ, директор на Секретаријатот на ЦЕФТА вели дека ЦЕФТА е клучна во градењето на Заедничкиот регионален пазар и неговата интеграција во единствениот пазар на ЕУ.
„Ќе се фокусираме на четири клучни приоритети - проширување на зелените коридори / зелени ленти кон соседните земји-членки на ЕУ, понатамошно усогласување на процедурите во рамките на ЦЕФТА преку договорите за заемно признавање (МРА), градење на регионален пазар за е-трговија и воспоставување на механизам за решавање спорови, рече Ѓикиќ и додаде дека овие активности ќе ги намалат трошоците за трговија и времето поминато на премините, ќе овозможат производите и услугите побрзо дастигнат до пазарот на ЦЕФТА и ќе ги отстранат нетарифните бариери меѓу страните.
Министерот Бектеши рече дека активностите на ЦЕФТА се насочени кон олеснување на трговијата со стоки и услуги и воспоставување регионален пазар за е-трговија.
„Пазарот за електронска трговија на ЦЕФТА денес се проценува на околу 1 милијарда евра, со силен раст. Нашата работа е да овозможиме пристап до овој пазар за млади и креативни луѓе кои можат да создадат работни места за повеќе млади. Треба да извезуваме стоки и услуги преку Интернет, ЦЕФТА одобри патоказ за да се води нашиот пат кон отстранување на најголемите бариери за прекугранична дигитална трговија, истакна министерот за економија Крешник Бектеши.
Во рамките на Сесијата за Зелената агенда, учесниците дискутираа за резултатите од Зелените ленти и ја поздравија иницијативата за нејзино проширување кон соседните земји-членки на ЕУ.