Жерновски: Помина една година од фолклорниот настап на Иванов

Добивај вести на Viber

Андреј Жерновски, заменик-министерот за надворешни работи, по синоќешниот говор на премиерот Зоран Заев пред Генералното собрание на ОН во Њујорк, потсети дека пред една година на истото место зборувал поранешниот претседател Ѓорѓе Иванов, кој како што вели тој, се трудел по секоја цена Македонија да остане заведена под референцата БЈРМ непосредно пред референдумот за Преспанскиот договор.

„Помина точно една година од фолклорниот настап во Њујорк на тогашниот претседател на државата, кога од петни жили се бореше во ОН да останеме заведени под името БЈРМ, кое,пак, пред да излезе на говорница, го покриваше со лист хартија.
Да го споредиме неговиот со вчерашниот говор на премиерот Заев, да ја споредиме тогашната со сегашната реакција и поддршка на меѓународната заедница.
За само 365 дена, од блокирани евро-атлански интеграции и блокирана иднина на нашите деца, до влегување во НАТО и ЕУ со полни едра!“, напиша Жерновски на својот профил на Фејсбук.

Жерновски лани ја напушти салата на  Обединетите Нации за време на обраќањето на тогашниот претседател Иванов на генералната дебата на 73. сесија на Генералното собрание во Њујорк. Жерновски вели дека тоа го сторил за да не му даде легитимитет на говорот на Иванов кој го оквалификува како скандалозен на три дена пред референдумот.

Заев синоќа зборуваше дека Македонија е пред портите на НАТО и дека очекува доделување на датум за преговори од ЕУ во октомври по договорите со соседните земји и како што рече премиерот, спроведените внатрешни реформи.