Лагард: Вакцинацијата има бавен тек во ЕУ, најмногу стравувам дека владите може „брутално“ да ги прекинат стимулативните мерки
Објавено во: Економија 21 Февруари, 2021
Претседателката
на Европската централна банка, Кристин Лагард, во интервју за Си-Ен-Ен изјави дека
нејзиниот најголем страв не е дека Европската Унија ќе западне во „планина“ долгови,
туку дека владите можат „брутално“ да ги прекинат стимулативните мерки.
Таквите програми, додаде таа, мора „постепено“ и внимателно да се релаксираат.
„Ова е најтешкиот и најсуптилниот момент кога треба да се направат проценки“, рече Лагард во интервјуто за Си-Ен-Ен.
Некои политичари се загрижени дека земјите ќе позајмат премногу за да ја поддржат економијата оваа година, но Лагард не мисли така.
Владите издвоија милијарди долари помош во текот на изминатата година за да го ублажат економскиот шок предизвикан од пандемијата на Ковид-19, со поддршка на централните банки, како што е ЕЦБ.
Европските лидери исто така одобрија пакет за економско закрепнување од 1,8 милијарди евра и буџет за помош во зајакнувањето на економиите на ЕУ кога ќе помине кризата. Лагард, сепак, нагласува дека дури и кога економијата ќе почне да се подобрува и закрепнува, политичарите не треба да ја повлекуваат поддршката прерано. Во својата најнова прогноза, објавена во декември, ЕЦБ предвиде дека европската економија ќе порасне за 3,9 проценти во 2021 година, а производството ќе достигне одредено ниво пред пандемија до средината на 2022 година.
Лагард истакна дека ваквите прогнози во голема мера зависат од вакцинацијата, која има бавен почеток во Европската унија.
ФОТО/EPA