ЗДЕЛКИ ТЕШКИ НАД 35 МИЛИОНИ ЕВРА - во рацете на малите акционери на „Макстил“

Добивај вести на Viber

Собранието на акционери на компанијата „Макстил“ што треба да се одржи за околу еден месец, ќе биде прилично интересно за инвеститорската јавност. Во рацете на малите акционери на компанијата се зделки „тешки“ над 35 милиони евра, и дали тие ќе се реализираат, ќе зависи токму од овие ситни сопственици на акции.

Како што е познато, Законот за трговски друштва им овозможува екслузивно право на малите акционери да одлучуваат за зделки на компаниите кои се поврзани со поголемите акционери.

А во случајот со „Макстил“, „Дуферко“ контролира 81,78 отсто од акциите на челичната компанија. Или попрецизно, податоците на Централниот депозитар за хартии од вредност говорат дека „Дуферко скоп инвестмент лимитед“ поседува 62,4 отсто од акциите, додека, пак, другата фирма која е исто така на оваа компанија, „Дуферко скоп ЛТД“ располага со 19,38 проценти од акциите.

Наспроти доминантниот акционер „Дуферко“ со 81,8 отсто од акционерскиот капитал, остатокот од акциите во „Макстил“, односно 17,51 отсто, се распрснати кај огромен број мали акционери, дури 5.357 домашни физички лица.

Токму овие ситни акционери ќе треба да го кажат својот конечен збор за зделките кои се склучуваат меѓу „Макстил“ и „Дуферко“. Ова од причина што, согласно Законот за трговски друштва, „Дуферко“ во ова гласање би имал конфликт на интерес, па затоа овие зделки би морало да ги одобри мнозинството од овие 5.357 домашни акционери.

Бидејќи станува збор за голема бројка од многу мали акционери, во инвеститорската јавност се поставува дилемата кој од нив ќе ги гласа и дали ќе бидат одобрени овие зделки од мнозинството мали акционери на компанијата.

На вчерашното тргување, пак, цената на акциите на „Макстил“ забележа пораст од 3,2 проценти.

Инаку, станува збор за неколку зделки што треба да добијат „благослов“ од малите акционери, но главната, или најголемиот „капиталец“ од нив, е Договорот за преработка помеѓу „Дуферко СА Лугано“ и „Макстил“, кој во апсолутен износ тежи дури 34 милиони евра.

Во релативен износ, пак, зделката зафаќа дури 31,76 проценти од книговодствената вредност на имотот на друштвото за минатата година. Овде се работи за Договор за преработка на старо железо и челичен полуфабрикат, односно челични слабови - во челични лимови, што траба да биде направено од страна на „Макстил“, а вкупната вредност на таа деловна соработка за годинава се очекува да изнесува 34 милиони евра.

За оваа зделка од компанијата навеле дека „Макстил“ и „Дуферко“ СА Лугано, Швајцарија се поврзани друштва, односно се дел од групацијата „Duferco International Trading Holding (DITH)“.

„Согласно одредбите од Законот за трговски друштва, Ве известуваме дека акционерите на ‚Макстил' имаат право да не се согласат со големата зделка“, навеле од компанијата до Собранието на акционери.

Покрај оваа голема зделка, има и неколку други помали, како што се договор за препродажба на огноотпорни материјали, во апсолутен износ од 1,441 милиони евра, или во релативен 1,35 отсто од книговодствената вредност на имотот. Вториот договор е договор за технички услуги, на сума од 159 илјади евра, или 0,15 отсто на релативен износ. Договорот за технички услуги ги опфаќа услугите поврзани со организацијата на производството и стандардите за квалитет, од страна на „Дуферко СА Лугано“ кон „Макстил“, а со цел подобрување на производниот процес на компанијата. Третата зделка е Договор за услуги, вреден 72 илјади евра, или 0,07 отсто во релативен износ, а услугите се поврзани со организацијата на транспортот и царинските постапки потребни за испорака на челични лимови произведени во „Макстил“. И последниот Договор е за услуги поврзани со набавка на феролегури, во апсолутен износ од 33 илјади евра, или на релативен износ од 0,03 отсто од книговодствената вредност. 

„Макстил“ завчера преку Берзата го објави Јавниот повик за Годишното собрание на акционери, кое треба да се одржи на 15 јули. Собранието ќе се одржи по пат на кореспонденција, со оглед на вонредната состојба, а со цел почитување на заштитните мерки против коронавирусот.

Акционерите на компанијата ќе разгледуваат повеќе точки, меѓу кои Одлука за усвојување на годишната сметка, финансиските извештаи и годишниот извештај за работењето за 2019 година, разгледување на Извештајот на овластениот Ревизор, потоа носење одлука за одобрување на работата на членовите на Одборот на Директори за минатата година, одлука за усвојување на Годишниот Извештај од Службата за внатрешна ревизија, како и Одлука за распоредување на нето добивката за минатата година.

Покрај овие точки, акционерите ќе треба да се изјаснат и за носење на Одлука за одобрување на големата зделка, како и одлуки за одобрување на другите помали зделки со заинтересирана страна.

„Големата зделка во текот на наредните 12 месеци, сметано од денот на одобрувањето, се очекува да изнесува 31,76 отсто, или повеќе од книговодствената вредност на имотот на друштвото, па од тие причини е потребно истата да биде одобрена од страна на Собранието на акционери“, се вели во предлогот до Собранието.

Инаку, книговодствената вредност на имотот на друштвото изнесува 107, 05 милиони евра.

Нина Нинеска-Фиданоска