2020-та: Невиден пад на угостителско-туристичкиот сектор
Објавено во: Економија 31 Декември, 2020
Годинава што изминува ќе заврши со пад на прометот од преку 70 отсто во туризмот и угостителството. Компаниите и покрај тоа што до сега имаше неколку пакети со економски мерки од државата, бараат посебни мерки за поддршка од државата за да опстанат и да ги задржат вработените.
Заклучно со октомври, евидентирани се само 414.824 туристи со реализирани 1.589.009 ноќевања, што е намалување за 47,2 отсто. Бројот на странски туристи бележи пад од 84,1 отсто.
Даниела Василевска Михајловска, самостоен советник во Стопанската комора на Македонија, очекува падот да биде уште поголем во последниот квартал со оглед на уште поголемите рестрикции и скратувањето на работното време.
– Сепак, податоците од официјалната статистика покажуваат дека владините мерки пред се, во делот на издавање на ваучерите за одредена категорија граѓани како поддршка на туристичко-угостителскиот сектор, дадоа резултат во туристичките центри особено во летната сезона, велиу Василевска Михајловска.
Кај туристичките агенции има пад од 99 отсто во вториот и речиси 88 проценти во третиот квартал, а кај угостителските објекти најголем е кај хотелите и останатите објекти за ноќевање од 88 проценти во второто, односно 54,3 отсто во третото тримесечје. Василевска Михајловска побара и системски решенија за овој сектор и подобро таргетирање.
- Она што е извесно е дека секторот туризам и угостителство многу брзо може да даде позитивни резултати по завршување на кризата, со отворање на границите и анкетите што во светски рамки се прават за интересот на луѓето за патување, но сепак фактот дека корона вирусот трае, а вакцинирањето е процес кој нема да заврши брзо, остава простор и можност негативните ефекти да се чувствуваат уште одреден период и во 2021 година. За таа цел, потребно е овој сектор како посебно погоден од светската пандемијата да биде поддржан и во периодот што следи, со цел да се одржи кондицијата на компаниите, да се задржат работниците на работа, агресивна промотивна кампања на дестинација, поддршка на ПЦР тестови за странски туристи а со тоа и атрактивноста дестинацијата Северна Македонија пред потенцијалните странки туристи, вели таа.