Аеродромот на вода влезе во Собрание, Субрата Рој дојде во Македонија

Добивај вести на Viber

Предлог законот за дополнување на Законот за внатрешна пловидба, по скратена постапка, со кој се создава правна регулатива за функционирање аеродром на вода, доби поддршка од собраниската Комисија за транспорт, врски и екологија. Со предложените решенија  целосно се уредува обележувањето подрачје на аеродром на водена површина, начинот на полетување, слетување, маневрирање и оперирање во границите на аеродромот на таква површина, како и местата, начинот и условите за слетување на хидроавион вон аеродромот на водена површина.

Според образложението од Министерството за транспорт и врски, кое преку јавен повик со Предлог законот треба да овозможи безбедност во внатрешната пловидба, со цел создавање услови за зголемување на туристичката понуда со нови содржини атрактивни за туристите во државава.

Објектите на вода, чие поставување е во функција на развој на туризмот, според образложението, претходно треба да бидат планирани со урбанистичко планска документација за туристичка развојна зона. Одобрение за поставување таков објект може да добие само правно или физичко лице кое има склучено договор за отуѓување на градежното земјиште за туристичката развојна зона, склучен со Агенцијата за промоција и поддршка на туризмот. Одобрение за локација за поставување објект на водена површина издава Министерството за транспорт и врски.

Инаку уште минатиот месец министерот за транспорт и врски Миле Јанакиески, при посетата на Струга информираше дека на повикот што го распиша Министерството, интерес за изградба на аеродром на вода пројавила една заинтересирана компанија.

„ Аеродромот на вода во Охрид нема да се гради како цврста и бетонизирана  градба, туку станува збор за обележување на Охридското Езеро за да се воспостават одредени норми за полетување и слетување“, појасни министерот Јанакиески, истакнувајќи дека се внимава максимално на еколошките стандарди со оглед дека Охридското Езеро е заштитено од УНЕСКО. Инаку, медиумите изградбата на аеродромот на вода во Охридското езеро веќе ја поврзаа со инересот на Индиецот Субрата Рој за изградба на лукзузен хотелски комплекс во Љубаниште. Тој денеска простигнива во тродбевна посета на Македонија, за време на која се очекува да се прецизираат деталите околу неговите инвестиции во земјава.