Агенцијата за медиуми бара повеќе македонска продукција, помалку турски и индиски серии

Добивај вести на Viber

Македонските телевизии да емитуваат повеќе програма од домашно производство, а во втор план да ги стават сериите од турска и индиска продукција, апелира Агенцијата за аудио и аудио-визуелни медиумски услуги. Националните радиодифузери имаат обврска годишно да произведуваат 20 часа играна и 10 часа документарна програма, а државата ќе субвенционира половина од трошоците. Целта е домашното производство на квалитетна програма да ги истисне турските и индиските серии кои сега се доминантни на ТВ програмите. „Со Агенцијата за филм се договараме како да го поддржиме телевизиското емитување на филмски проекти и на оние кои веќе постојат, но и на новите, секако со почитување на авторските права и како да ја популаризираме можноста да се конкура за продукција на ТВ-проекти при што, доколку се исполнат одредени критериуми може дел од вложените средства да се вратат“, вели директорот на Агенцијата за аудио и аудиовизуелни медиуми, Зоран Трајчевски. Агенцијата за филмски фонд оваа година почнува со евиденција на филмови кои што се дистрибуираат во Македонија, кои што се снимаат во Македонија и е во подготовка изработка на он-лајн дата база. Пред секое емитување на филмови од продукциите, телевизиите мора да склучат договор за нивно емитување. „Во дата-базата ќе бидат достапни информациите за сите филмови кои што дистрибутерите од Македонија ги дистрибуираат во земјава и оние кои што сакаат да ги прикажуваат ќе можат лесно да видат кои филмови се веќе достапни за прокажување, со кој рок на права, на колку години“, објасни директорот на Агенцијата Дарко Башески. Обврската да ја класифицираат програмата според возраста и времето на прикажување, покрај телевизиите, од сега важи и за филмовите во кино салите. Челниците на двете агенции денеска потпишаа Меморандум за соработка со кој се овозможува поефикасна комуникација меѓу институциите, од која корист ќе имаат и радиодифузерите и гледачите.