Аманатидис: Договорот што ќе дојде, ќе ги има карактеристиките што ги постави нашата земја
Објавено во: Балкан 01 Јуни, 2018
Доколку има согласност од другата страна, тогаш ќе имаме договор, изјави заменик министерот за надворешни работи на Грција, Јанис Аманатидис во интервју за грчката телевизија „Скај“.
Тој коментира дека по 11 месеци преговори, по важните средби во текот на мај како меѓу министрите за надворешни работи, така и меѓу двајцата премиери, сега Зоран Заев и Алексис Ципрас го оценуваат она што го одлучија шефовите на двете дипломатии, а го разработија техничките и правните тимови од двете страни.
„Сметам дека договорот што ќе дојде, ќе ги има карактеристиките што ги постави нашата земја. Сложено име, ерга омнес, уставна ревизија“- вели Аманатидис.
За тоа дали постои име што преовладува за решение објасни дека за време на последните преговори во Брисел било разговарано за четирите предлози од медијаторот.
Аманатидис изрази надеж дека договорот ќе добие широка поддршка во Грција.