Анѓушев за албански компании добитници на грантови: Требало да аплицираат повеќе

Добивај вести на Viber

Вицепремиерот Кочо Анѓушев одговарајќи му денеска на пратеникот Сурија Рашиди на седница изјави дека грантови од повикот на Фондот за иновации и технолошки развој добиле две или три компании чии сопственици се Албанци од вкупно десет што аплицирале. 

Пратеникот  праша зошто е мал нивниот број.

„Тоа не отстапува од бројот или од процентот колку што добиле и сите останати. Требало да аплицираат повеќе и веројатно и ќе добиеле повеќе. Ни на крај не ми паднало ниту имам намера да размислувам на тој начин – која фирма е македонска, која е албанска. Во моето работење има само еден пристап – дали знае или не знае да работи“- рече Анѓушев.

Појасни дека на повикот се пријавиле над 300 компании од кои грантови добиле 79 по две селекции од експерти и дека за изборот не одлучлувала ниту некоја институција, ниту Кабинет, ниту министер.

Рече и дека средствата од грантови ИПА-програмата за конкурентност за следните четири години ќе бидат главно насочени за мали и средни компании. Тоа е за да има рамномерен регионален развој тие ќе бидат само за трите економски најнеразвиени подрачја – полошкиот, североисточниот и југозападниот регион.

Премиерот Зоран Заев вели дека целата ситуација покажа дека процесот бил воден јавно и транспарентно со што ги покажа недостатоците и аномалиите, кои сега се коригирани.