Анима Мунди бара дозволи за активистите пред денешната владина седница

„Има ли крај на апсурдот – кинолози добиваат дозволи за движење и спроведување активности во полициски час, грижа на одгледувачници кои генерираат профит, а постојат „на диво“ ; додека за активисти за права на животните, кои се грижат неретко и за цели стационари бездомни кучиња и на тој начин помагаат во решавање на проблемот на општините, дозвола нема!“, пишуват од Анима мунди на својата фејсбук страница.

Веќе едн недела, велат, талкаат низ институционалните лавиринти со цел да обезбедат дозволи за (контролирано, временски ограничено и одговорно) движење на активисти кои се грижат за бројни бездомни животни, локализирани/стационирани/уклонети од улица, кои зависат од човечка грижа и кои не можат да бидат оставени со денови без храна и вода, додека трае полициски час. 

„Од Министерството за информатичко општество и администрација каде што доставивме Барање согласно предвидените процедури сме препратени до Владата и Кризниот штаб, од таму во општините, па во локалните полициски станици, но решение нема... Тук таму се добиени дозволи за одредени поединци, додека други се одбиени , без образложение.

Ние ги почитуваме мерките на Мин. за здравство и Владата, ја разбираме сериозноста на ситуацијата во која се наоѓаме и во ниту еден случај не би ги нарушиле предвидените мерки и процедури, но веќе со недели укажуваме дека е неопходно да се согледа аспектот на нашето дејствување (со кој ја помагаме државата и општините) и БАРАМЕ ИТНО да ни биде дозволено движење во ограничен временски рок со цел грижа (храна, вода, основна вет. помош) за бројните бездомни животни за кои се грижиме.

Ова дотолку побргу мора да се реши бидејќи доаѓаат денови на Велигденските празници кога се најавуваат повеќе денови полициски час.

Активистите не се престапници за да дејствуваат скришно, криејќи се од полицијата, туку хумани граѓани кои во овие времиња на криза не можат да запрат со грижата на оние кои зависат од нас, а тоа се животните. БАРАМЕ да активистите за заштита на животните наидат на институционално разбирање и ги добијат истите права како другите категории на граѓани чие дејствување има допирни точки со животни (на пр. кинолози, ловочувари и слично).“, пишуваат од Анима Мунди.