ГОЛЕМА ПРОМЕНА НА ВРЕМЕТО ОД НЕДЕЛА: дождови, силен ветер, но и голем пад на температурите најавува Попоски

Добивај вести на Viber

Под влијание на многу постудена воздушна маса од север, која ќе биде поврзана со Атмосферски фронт, во недела и во понеделник ќе имаме нагла и голема промена на времето. Ќе има поголема облачност, особено во недела кога ќе има повремени врнежи од дожд и локална појава на грмежи. Не се исклучува можноста и за појава на локално невреме, најавува метеопрогнозерот Славчо Попоски. 

- Во недела и во понеделник ќе дува повремено силен ветер од северен правец (над 60 км/час), и истиот најмногу ќе биде изразен Долж Повардарието. Во недела попладне и во вечерните часови можно е провејување на снег на највисоките планински места во државава.

Што се однесува до температурите, тие во недела попладне и навечер нагло и значително ќе опаднат, за околу 10 степени во споредба од оние кои ги имаме сега. Во северните предели температурите ќе опаднат и за 15 степени, па така особено постуден ден ќе биде понеделник кога наутро температурите ќе се спуштат во интервалот од 3 до 11 степени, на високите  и на планинските места каде се очекува да се спуштат до околу нулата, а максималните дневни температури во понеделник ќе се искачуваат во интервалот од 11 до 19 степени - посочува Попоски во објавата на „Метеоаларм“.

Според него, уште постудено утро поради целосното разведрување ќе има во вторник кога минималните температури ќе се спуштаат во интервалот од - 2 до 7 степени. Во понеделник и во вторник наутро е можна појава на слана  и на мраз на повеќе места низ Македонија.

Оваа нагла и бурна промена на времето лошо ќе се одрази врз метеопатите.