Апелација ги намали затворските казни за „крвавиот четврток“

Добивај вести на Viber

Апелација ги намали за една до две години затворските казни на осудените за „27 април“. 

Aпелациониот суд ја потврди и ослободителната пресуда за оперскиот пејач Игор Дурловски и покрај тоа што обвинителството се жалеше. Преиначена е пресудата на Митко Чавков кој наместо првичните 18 ќе одлежи 16 години в затвор. Влатко Трајковски и Никола Митревски – Кољо се осудуваат на казна затвор во траење од по 14 години, а првостепено беа осудени на по 15 години. На по 13 години затвор се осудуваат и Митко Пешов, Душко Лазаров, Горан Ѓошевски – Леви, Мунир Пепиќ, Јане Ченто и Вилијам Михајловски на кои првостепените казни им биле по 15 години освен на Михајловски 14.

Оливер Поповски,  Младен Додевски, Горанче Анѓеловски и Игор Југ се осудуваат на казна затвор во траење од по 11 години и нив казната им е намалена за една до две години. Обвинетиот Оливер Радулов се осудува на казна затвор во траење од девет години, а претходно добил 10 годишна затворска казна. Александар Василевски Нинџа се осудува на казна затвор во траење од седум години  и нему првичната пресуда му е намалена на една година, а истото е и со Абдуљфета Алими кој сега е осуден на шест годишна затворска казна.  За организаторите на упадот во Собранието се уште се води судскиот процес. Упадот се случи на 27 април 2017 година кога толпа влезе во Собранието, при што демонстранти тепаа пратеници.