Арсовски: Инвеститорите веруваат во стабилни банки како ТТК Банка

Добивај вести на Viber

Ова е пионерски чекор за нашиот пазар кој покажа дека има голем интерес од инвеститорите за вложување во корпоративни обврзници на стабилни и перспективни банки како што е и ТТК банка, вели Драгољуб Арсовски, директор на банката. ТТК Банка успешно ја реализираше првата емисија на долгорочни должнички хартии од вредност – корпоративни обврзници по пат на јавна понуда.

Фактор веќе објави дека имаше голем интерес за понудата. За исклучително брзо време, во првите секунди од отворањето на јавната понуда, се запишале и уплатиле над 100 отсто од понудените 1.500 обврзници по номинална вредност од 1.000 евра, со рок на доспевање од пет години и три месеци, а во вкупна вредност од 1.500.000 евра. Инаку каматната стапка е фиксна и изнесува 3,5 отсто годишно. Бројот на заинтересирани инвеститори трикратно ја надмина понудената количина.

„Oвој пионерски чекор за нашиот пазар - прва успешна продажба на корпоративна обврзница издадена од ТТК Банка АД Скопје по пат на јавна понуда на примарниот регулиран пазар на Македонската берза, покажа дека постои голем интерес од инвеститорите за вложување во корпоративни обврзници на стабилни и перспективни банки што е потврда за успехот и резултатите на ТТК Банка АД Скопје. Издавањето на оваа хартија од вредност значи поддршка на развојот како на примарниот така и на секундарниот пазар на капитал. На овој начин ТТК Банка АД Скопје ја потврдува својата определба да го истакне значењето на користењето на производите на пазарот на капитал и нивното комбинирање со депозитите како традиционални извори на финансирање“ - изјави Арсовски, претседателот на Управниот одбор на ТТК Банка.

Од банката велат дека одлучиле да се финансираат на ваков начин за да обезбедат долгорочни и стабилни извори на средства, но и да ја зајакнат капиталната сила и вкупниот финансиски капацитет на банката.

Обврзниците во наредниот период ќе се котираат на регулираниот пазар на Македонската берза каде ќе бидат достапни за секундарно тргување за инвеститорите, правни и физички лица. Приходите од вложување во обврзница се стабилни и предвидливи, што ги прави популарни за инвеститорите кои сакаат да остварат редовни приходи.

Од ТТК Банка велат и дека во 2018 година ги оствариле своите најдобри финансиски резултати, а во 2019 година ќе продолжат со активна поддршка на физичките и правни лица при остварување на нивните финансиски цели и потреби. Фактор веќе пишуваше за продорот на банката.

ТТК Банка АД Скопје ќе ги искористи прибраните средства од емисијата за финансирање и понатамошен развој и унапредување на работењето со физичките и правни лица.