Бегаат од Венецуела и сакаат да живеат во Словенија
Објавено во: Балкан 11 Јуни, 2019
Потомците на Словенците бегаат од Венецуела, и сакаат да заминат во Словенија.
Канцеларијата за дијаспора на словенечката влада добила повеќе од 20 барања за преселување во татковината на словенечките државјани и нивните потомци кои живеат во Венецуела, јужноамериканската држава погодена од тешка економска и политичка криза.
Оваа акција во мај ја поттикна словенечкото министерство за надворешни работи, а ја одобри парламентарниот одбор за иселеништво. Тие одговорија на апелите на луѓето со словенечко потекло кои велат дека во Венецуела поради тешката криза останале без извори на приход и здравствена заштита.
Љубљанско Дело пишува дека меѓу оние кои аплицирале за преселување во Словенија има повеќе високообразовани лица кои би прифатиле каква било работа во Словенија.
Ниедна молба за репатријација засега не е одобрена затоа што се чека предлог на специјален закон кој тоа би го овозможил.
Владата им одобрила парична помош од вкупно 1.500, а преку канцеларијата на Европската комисија за хуманитарна помош и кризен менаџмент 50 илјади евра за трошоци за лекување.
Се претпоставува дека во Венецуела живеат неколку илјади Словенци.
Венецуела е во длабока политичка, но и финансиска криза.