Бислимовски: Град Скопје може да ја превземе лиценцата на БЕГ и за време на грејната сезона
Објавено во: Економија 06 Октомври, 2019
Марко Бислимовски, претседателот на Регулаторната комисија за енергетика, за Алфа ТВ рече дека Град Скопје преку новоформираното градско претпријатие Градски енергетски системи (ГЕС) може да ја превземе лиценцата од БЕГ за стопанисување со топловодната мрежа дури и кога во тек е грејната сезона.
- Тоа еднаш се случи во 2012 кога БЕГ ја превзеде лиценцата од „Топлификација“, но немаше прекин во снабдувањето со топлина. За нас најважно е граѓаните редовно да добиваат затоплување на домовите и да нема прекини, што е и наша законска обврска. Можам да кажам дека во моментов ГЕС ја нема потребната лиценца, но тоа е возможно и за време на грејната сезона. Од друга страна, БЕГ има лиценца во траење од 35 години и тоа треба да се разгледа, вели Бислимовски.
Тој додаде дека ако сака да ја добие лиценцата, ГЕС ќе мора да има соодветен кадар и соодветна организациона поставеност. Додава дека допрва ќе се види дали ова градско претпријатие ќе понуди можности да се намали цената за парно-греење.