Бочварски: Нема да се бараат уште пари за автопатот Кичево - Охрид

Добивај вести на Viber

Министерот за транспорт и врски Благој Бочварски денеска пред новинарите рече дека нема да се бараат повеќе пари од предвиденото за доизградба на автопатот Кичево - Охрид, на медиумско прашање дали постои гаранција дека нема да се надмине кредитната рамка од 598 милиони евра.

Досега се потрошени околу 440 милиони евра, со што остануваат уште околу 160 милиони евра од кинескиот кредит за довршување на делницата, кој е продолжен до 31 декември 2026 година.

Бочварски рече дека средства има, но она што сега е важно е да се напрвата техничките решенија за свлечиштата кои се појавија на делницата. Собранието на 1 април на итна седница го изгласа предлог на Владата, односно на ресорното Министерство за транспорт и врски рокот за завршување на градежните работи на оваа автопатска делница чиј изведувач е кинеската копанија „Синохридро“ да биде продолжен до 31 декември 2026 година. Претходно рокот за изградба на автопатот беше до крајот на минатата година, но 13-те свлечишта кои се појавија беа причината да се донесе нов анекс за негово продолжување.

„Во однос на реализацијата на автопатот Кичево-Охрид веќе најавивме дека согласно насоките од надзорниот инженер и целиот тим кој што работи од страна на надзорот и Фидик-експертите беше дадена препорака за продолжување на рокот поради 13-те нови свлечишта коишто се појавија. Како што знаете има сè уште средства коишто се ставени на располагање за да бидат реализирани и токму поради тоа не се побараа нови средства за реализација на овој автопат. Средства има, важно е да се направат побргу техничките решенија за свлечиштата коишто се појавија и да продолжи реализацијата и градбата на оваа делница од коридорот 8“изјави Бочварски кој вршеше увид во изградбата на браната на реката Отиња во Штип.