Боки 13 имал 4 пиштоли, а Катица мини теретана и боксерска вреќа
Објавено во: Македонија 31 Јануари, 2020
На денешното рочиште за Рекет, на видеобим беа презентирани снимки од претресот што бил вршен во куќата на поранешната специјална обвинителка Катица Јанева.
На тој начин оние што присуствуваа во судницата можеа практично визуелно „да ја посетат“ куќата на поранешната шефица на СЈО, која се наоѓа во Козле, а во која престојуваше додека беше на оваа моќна функција.
Од снимките од претресот можеше да се види запленетата гарнитура од 5.000 евра, како и “Луј Витон” чантата, која обвинителството ја одзело како доказ. Но, треба да се има предвид дека таа не е истата со онаа торба исто така од брендот „Луј Витон“, во која беа спакувани еден милион евра.
Беа прикажани и белешки од тефтер на Јанева, но што во него пишувало, присутните не можеа да прочитаат. Единствено можеше да се види дека има белешка со содржина “Дали има други снимки, по се изгледа не”, а на некои од страните се читаше и името “Боки”.
Инаку, од фотографиите направени при претресот во домот на поранешната обвинителка Катица Јанева се гледа дека таа имала мини теретана опремена со лента за трчање, велосипед и боксерска вреќа, додека Боки 13 пак имал мини колекција на оружје, односно биле најдени четири пиштоли, освен брендираната гардероба која е запленета.
Во Кривичниот суд во Скопје денеска продолжи судењето за предметот „Рекет”, во кој обвинети се Бојан Јовановски и поранешната шефица на СЈО Катица Јанева. Се прикажаа и фотографии од запленетата брендирана облека во домот на Боки, како и банкноти од странски валути.
Инаку, јавноста можеше да ги види кај Боки парчињата од познатите модни брендови како „Луј Витон”, “Долче и Габана”, „Диор” и други, а меѓу запленетата облека е и сребрената наметка од „Луј Витон” која Јовановски ја носеше на доделувањето на наградите „Story”.
Судењето за случајот Рекет продолжува на 6 февруари.