Брнабиќ тврди дека Заев и рекол дека Македонија ќе се воздржи од гласањето за прием на Косово во УНЕСКО
Објавено во: Балкан 23 Август, 2017
Српската премиерка, Ана Брнабиќ вели дека македонскиот премиер Зоран Заев на Самитот на Берлинската иницијатива во Трст и рекол дека Македонија ќе се воздржи од гласањето за прием на Косово во УНЕСКО.
„Во овој момент, мене тоа ми е најважно – претседателите во регионот да стојат на зборот“ - рече Брнабиќ.
Брнабиќ додаде дека Србија многу пати, на повеќе начини, покажала дека е конструктивна, флексибилна и толерантна, и покрај „некои изјави во регионот“, пренесува Танјуг.
Таа најави дека ќе оди на неформалниот состанок во албанскиот град Драч на 26 август, што претставува продолжување на Берлинскиот процес и на кој ќе бидат присутни лидерите од Западен Балкан.
Брнабиќ потврди дека таму ќе има средба со Заев и наведе дека на собирот ќе се разговара за тоа што треба понатаму да се работи, во смисла на развој и подобра иднина на регионот.