Цената на становите во Скопје во постојан пораст

Добивај вести на Viber

Цената на становите во Скопје е во постојан раст во текот на сите три досегашни квартали од оваа година, според податоците за недвижнини кои ги објави Народна банка на РМ.

Последниот квартал, односно во периодот од почетокот на јуни до крајот на септември, повторно е нотиран раст, иако само од 0,1 отсто.

Ова е минимално зголемување во споредба со забележаните 5,3% во вториот квартал, но сосема доволно за да се заклучи дека цената на становите во Скопје расте во текот на целата 2018 година. 

Истовремено цената раста и покрај зголемувањето од страната на понудата на нови станови.  

Во најновиот Квартален извештај се наведува дека расте и побарувачката за овие недвижности.

„Во однос на побарувачката, и во третиот квартал на 2018 година продолжи солидниот раст на станбените кредити“ се наведува во објавениот документ. Како што појаснуваат од НБРМ, позитивни поместувања се бележат и кај вредноста на издадените одобренија за градење на станбени згради по подолгиот период на намалување на нивната бројка.

Цената на живеалиштата во главниот град е мерена преку хедоничкиот индекс на цените на становите, кој од страна на НБРМ се изготвува врз основа на огласите за продажба на станови во главниот град што се објавени од агенциите за промет на недвижности.