Чаирска романтика: Кој ќе крпи дупки на патиштата за 287.800 евра?
Објавено во: Економија 08 Октомври, 2018
Општина Чаир за една година ќе потроши 287.000 евра за да ги крпи дупките на сервисните улици кои се под нејзина надлежност. Во договорот за набавка нема детали и описи за тоа колку асфалт ќе се стави на колку локации и за колку улици. Инаку Општина Чаир е една од најмалите скопски општини според територијата која изнесува 3,5 квадратни километри, но е најгусто населена општина во Република Македонија
Скопската фирма „ОСД Кирил“ ДООЕЛ доби договор од општина Чаир за крпење на асфалтни дупки во вкупна вредност од 287.800 евра, објавено е на интернет страницата на Бирото за јавни набавки. Договорот за јавна набавка е склучен во август при што општината го заверила на 13 август, а фирмата за 10 август. Од договорот може да се прочита дека ќе важи една година доколку финансиските средства наменети за крпење на дупките на патиштата не се исцрпат порано од предвидениот период.
Во договорот не пишува колку километри асфалтни патишта има вкупно општината ниту пишува кои улици и во кој обем треба да се покриваат со асфалт. Називот на јавната набавка е „крпење на улични дупки со асфалт“ и во договорот преовладува терминологијата која се однесува на пополнување на дупки со асфалт на постоечки улици кои се во ингеренција на општината. Тука треба да напоменеме дека сите булевари кои ги пресекуваат и поминуваат низ скопските општини не се во нивна надлежност и за нивното одржување се грижи Градот Скопје. Тоа значи дека општините се должни за одржување на сервисните улици. „Фактор“ во интерес на целосно и објективно информирање на јавноста испрати прашања до Општина Чаир во кои побаравме одговори за деталите од техничката спецификација односно колку километри патна мрежа одржува општината и колку асфалт е спефицициран за покривање на дупките на патиштата. Доколку добиеме одговори ќе ги објавиме во целост.
Може ли да се спореди?
Општина Чаир е најгусто населена општина во нашата држава. Според последниот попис и официјалните податоци на Државниот завод за статистика (ДЗР) во оваа општина живеат 16.193 жители на еден квадратен километар. Општината Чаир е една од најмалите општини во Скопје и воопшто во земјава затоа што има територија од 3,5 квадратни километри. Оваа општина за своите сервисни улици, за чија должина немаме податок затоа што го нема во договорот, ќе плати над 287.000 евра на најповолен понудувач. Ако може да се спореди иако е деликатно, затоа што има малку елементи за споредба, ЈП „Македонијапат“ државниот монопол задолжен за одржување на автопатите, магистралните и регионалните патишта склучи годишен договор за набавка на битумен за крпење на дупките по патиштата и за битуменот ќе плати 5,46 милиони евра. „Македонијапат“ сама ќе прави асфалт, а за главната состојка – битуменот плаќа 5,46 милиони евра. „Македонијапат“ одржува патна инфраструктура од 4.400 километри ширум целата Република Македонија.
Р.Ф.