Чешки хакер „олесни“ гостиварска фирма - за колкава сума се работи?
Објавено во: Македонија 05 Април, 2018
Чешки хакер ограбил гостиварска фирма така што ја хакирал електронската пошта.
Надворешната канцеларија за криминалистички работи Гостивар поднесе кривична пријава против А.В.(28) од Република Чешка за сторено кривично дело компјутерска измама, информираа од полицијата.
Чехот од 5 март 2016 година до 27 април истата година лажно се претставувал како сопственик на фирмата „Памеса Керамика” со седиште во Шпанија, со која фирмата на гостиварецот Е.Ш.(54) имала деловна соработка.
Хакерот претходно ја пресретнал електронската комуникација меѓу фирмите, па на Е.Ш. му испратил мејл од електронска адреса индентична на „Памеса Керамика”.
Измамникот побарал од гостиварецот парите од првата рата од купената стока, во износ од 3.600 евра да ги уплати на сметката на хакерот. Оштетениот на 27 април 2016 година ги уплатил парите, но после одреден временски период од Шпанците добил известување дека не се префрлени парите, по што Е.Ш. сфатил дека е измамен и го пријавил случајот во полицијата.