Дали поделба на Косово ќе предизвика војна?
Објавено во: Балкан 20 Јули, 2018
Косовските и српските политичари се со различни мислења за тоа дали поделбата на Косово може да доведе до војна.
Косовскиот премиер, Рамуш Харадинај се спротивстави на идејата за размена на територии со Србија и даде силно предупредување. Тој изјави дека за него тоа значи војна.
„Поделбата за мене значи војна, јас тоа го кажувам без двоумење и ризично е да се зборува за поделба“ - вели Харадинај, зборувајќи за прашањето за размена на територии, односно за поделба на Косово која во јавноста ја изнесе Љутви Хазири.
Рече дека секој што спомнува поделба ќе донесе трагедија на Балканот.
„Не е добро да се спомнува поделба. Секој што спомнува поделба, од која било причина, ќе донесе трагедија на Балканот“- кажа Харадинај.
Тој како што пренесува Коссев, кажа дека во овие услови не постои поделба, ниту размена на територии, бидејќи ситуацијата е загрозена.
Српскиот претседател, Александар Вучиќ кажа дека се надева дека нема да им војна и дека ќе се најде решение за Косово.
Но, како што истакна, секое одолговлекување би имало негативни последици по останатите прашања.
Коментирајќи ја изјавата на Харадинај дека ќе дојде до војна, ако има поделба на територијата, Вучиќ кажа дека тоа не е ни прв ни последен пат, и изрази надеж дека никогаш нема да дојде до војна, туку дека ќе се најде некакво решение.
„Бидејќи ги слушаме изјавите на Хашим Тачи, невозможно е да зборувате и да барате сѐ и да велите чекаме договор. Не е договор ако ни кажувате – сѐ е наше, а вие само признајте нѐ. Така договор нема да има“- изјави српскиот претседател.
Вучиќ повтори дека договорот е многу важен.
„Знам дека на луѓето им е тешко, дека најмногу сакаат никогаш ништо да не се договори, да се одолговлекува, но не може да се одолговлекува, бидејќи околу другите прашања ќе бидеме во сѐ потешка и послаба ситуација“- кажа Вучиќ.
Истакна дека е важно да се зачува мирот, да оди земјата напред, но и да се бара решение кое нема да го извалка образот на Србија и ќе ги задоволи државните и национални интереси, па дури и да е делумно незадоволувачко.