Добивај вести на Viber
ТТК Банка до редакцијата на Фактор испрати демант на дел од податоците содржани во текстот ‘’Само дивидендата од ТТК Банка го држи Тетекс во добивка’’. Демантот го објавуваме интегрално:
„Врз основа на законската регулатива за јавно информирање, а во интерес на правилно информирање на корисниците на Вашите информации, поврзани со текстот под наслов ‘’Само дивидендата од ТТК Банка го држи Тетекс во добивка’’, објавен денес, 11.08.2014 година, од страна на авторот Р.Ф. дозволете да побараме од Вас на соодветен начин да објавите наш демант на податокот, содржан во текстот, кој се однесува на износот на исплатената дивиденда од страна на ТТК Банка АД Скопје на акционерот Тетекс АД Тетово.
Во текстот стои дека ТТК Банка АД Скопје на акционерот Тетекс АД Тетово му исплатила дивиденда во износ од ’’82,3 мил. денари’’ што не е точно.
ТТК Банка за 2013 година исплати дивиденда за своите акционери во вкупен износ од 21,8 мил. денари и во тие рамки на најголемиот акционер во Банката му припадна дивиденда во износ од ‘’8,38 мил. денари’’.
Со оглед дека овој износ преставува дури 10 пати помал износ од споменатиот во текстот, кој пак е основа за главниот коментар на авторот Р.Ф., а кој не е вистинит, останува понатаму на корисниците на Вашите информации да ги анализираат деталите и целината на објавената анализа и како понатаму ќе ја користат.
Со оглед дека ТТК Банка АД Скопје е компанија која котира на Македонската берза и за која јавно се објавуваат финансиските податоци за нејзиното работење во законски утврдените рокови, овој демант има за цел да спречи погрешен јавен впечаток за било кој потенцијален инвеститор во Банката како котирана компанија“, стои во демантот кој стигна до нашата редакција.
Порталот Фактор изврши корекција на споменатиот текст и се извинува за сите можни настанати забуни.